امریکی سفیر کی سزا یافتہ نوازشریف سے ملاقات اندرونی معاملات میں مداخلت ہے

 

یہ اسی سازش کا تسلسل ہے جس کے تحت پی ٹی آئی حکومت ختم ہوئی، آج یہ شخص قومی اسمبلی کی نشست جیتنے کے قابل نہیں لیکن بیرونی آقاؤں کی شہہ پر اپنے اقتدار کا تخت سجانا چاہتا ہے، ترجمان پی ٹی آئی کا الزام

اسلام آباد (اردوپوائنٹ اخبارتازہ ترین ۔ 18 نومبر 2023ء) پاکستان تحریک انصاف نے سنگین الزامات عائد کرتے ہوئے امریکی سفیر کی عدالت سے سزا یافتہ مجرم سے ملاقات کے اعلامیے کو پاکستان کے اندرونی معاملات میں سنگین مداخلت قرار دیا اور اسے مکمل طور پر مسترد کر دیا ہے۔ ایکس پر جاری بیان میں ترجمان پی ٹی آئی کا کہنا ہے کہ اعلامیے کے مندرجات اس سازش کا تسلسل ہیں جس کے تحت عمران خان کی منتخب اور جائز جمہوری حکومت کا خاتمہ کیا گیا، امریکی سفیر کی عدالت سے سزا یافتہ نوازشریف سے ملاقات کے اعلامیے کے بعد سازش پوری قوم کے سامنے آشکار ہوچکی ہے، غیر سیاسی، غیرجمہوری اور غیرآئینی آمریت کی نرسری میں جنم لینے والے خاندان نے اپنے اقتدار کیلئے ہر داخلی و خارجی بیوپاری سے پاکستان کے مفادات کی سودے بازی کی، نوازشریف جب بھی وزارتِ عظمیٰ تک پہنچا، جمہوریت اور قومی مفاد کو ملکی و غیرملکی طاقتوں کے ہاں گِروی رکھ کر پہنچا، آج یہ شخص قومی اسمبلی کی اپنی نشست جیتنے کے قابل نہیں مگر ریاستی پناہ اور بیرونی آقاؤں کی شہہ پر سلطانئی جمہور کی بساط لپیٹ کر جمہوریت کے چیتھڑوں پر اپنے اقتدار کا تخت سجانا چاہتا ہے۔

(جاری ہے)

 

ترجمان پی ٹی آئی الزام عائد کیا کہ امریکی سفیر سے ملاقات کے اعلامیے میں سفیر کی جانب سے عوامِ پاکستان سے ایک مرتبہ پھر پاکستان مسلم لیگ (ن) کو قائدانہ کردار دے کر اپنے بھرپور اعتماد سے نوازنے کی توقع سفارتی آداب، دوطرفہ تعلقات، عالمی قوانین اور منصبِ سفارتکاری کے بنیادی قواعد و ضوابط سے سنگین انحراف اور قابلِ وضاحت معاملہ ہے، الیکشن کمیشن آف پاکستان مذکورہ اعلامیے کے مندرجات کا فوری نوٹس لے اور دفترِ خارجہ کے ذریعے امریکی سفاتخانے اور امریکی انتظامیہ سے معاملے کی وضاحت طلب کرے۔

 

ملکی سلامتی، آئین، جمہوریت اور انتخابات کی شفافیت کیخلاف کوئی خفیہ سازش یا اعلانیہ اقدام قوم ہرگز قبول نہیں کرے گی اور اس کے ملکی اہم آہنگی، داخلی سلامتی اور قومی یکجہتی پر سنگین اثرات مرتب ہوں گے، تحریک انصاف آئین کی بالادستی، جمہوریت کے دفاع، انتخابات کی شفافیت اور قوم کی حقیقی آزادی کے ایجنڈے سے ایک انچ پیچھے نہیں ہٹے گی۔